Genesis 23

Sarah kueram se Abraham te mutim tugumokko ali diaram

1Sarah ko yar tom 127 se nu Kiriath Arba baga kueram. Kiriath Arba ko nup bo Hebron, mu Canaan sor te. Se Abraham ko nia mokaso.

3Ale udagi te nu Sarah kumik guang beteram se bagaram, se nu Heth kariimet saki arungu munakurukko namaram. Ale balam, 4“Ani sor awar ko kari, se aninga ali bo imi te mena. Se ani kuwim aga imet te mutim tugumekko wore diarikko angamang aniso.”

5Se kariimet umu balman, 6“Kari biya, ni anananga den ikiko,” maman. “Ana ni karkasan ni ana ningi kari biya. Nika niwus anananga kuwim ningo bo imi te am mutim tugumko. Ana suen la nanga nangamang ali imi ni kisinak se ka niwus te am mutim tugumko.”

7Se Abraham Heth kariimet mu nomokete sanamaram ale tararam amilmil nungaru se 8balam, “Bare nina suen la ninga nengemang ani aiwus imi te mutim tugumekko, mu nina namaral Ephron, Zohar ko kuriang, maonalko. 9Ani manga gogong nup balsan Machpelah masan wore diarikko angamang aniso. Manga gogong mu Ephron ko ali duap te bagoso. Se nina maonal se manga gogong umu nina suen la nemetam te ani aisukko. Se ani ko koma diram tuek se ali mu aninga arukko.”

10Heth kariimet mu nunga wonong ko kar ko songkuring ago bagakasan. Tom nuna munak karogo mu kuwim mu te la tai biguwukasan. Se Heth kari Ephron ago bagakaso. Se nu kariimet suen biya nomokete Abraham ko den koma iwita balam, 11“Kari biya, ni aninga den ikiko,” mam. “Ali mu ko moke mena, ali se manga gogong umu lilim la kisekko. Aninga kariimet suen la nomokete ali imi kisek se ka niwus te mutim tugumko,” ma balam.

12Bare Abraham Heth kariimet nomokete tararam 13ale Ephron maonam, “Aninga agiring ikiko, se kariimet ago ikimonko, ani ali imi lilim aga manga te diarik ale aga imet te mutim tugumekko,” mam.

14Se Ephron balam, 15“Kari biya, ni ikiko. Ali imi ko koma manga biling silver 400, bare analak mel mu ko me balnakko, mu mel yam. Ka imet am te mutim tugumko.”

16Bare Abraham manga tom Ephron Heth kariimet nomokete balam mu ikiam ale Ephron maonam, “Terong!” mam. Ale diara kari betesan turantala, nu ko manga giam ale ko ikup skel te tuteram ikiam ale manga silver biling 400 Ephron tuam.

17Munan mu te Abraham Ephron ko ali Machpelah mu nu dia tam. Se ali umu sor Mamre ko pingita. Se Abraham ali ko tam melmasak lilim la, se kuwim nuwus te mutim tugumokko mu suen la diaram. 18Se Heth kariimet biguwura te animan mu nuna suen la ikiman, ali umu aitak Abraham ko ali ma balman.

19Se Abraham ko nuwus Sarah kumik guang manga gogong Canaan sor te aniram umutang ningi beteram. Se Heth kariimet nunga ali biling manga gogong karogo te aniram mu Abraham ko gue te kariimet nunga nungumik guang te mutim tuguma ko ali aram.

20